قصيدة بمناسة مولد الحجه

من طرف سلسبيل الإثنين يوليو 26, 2010 7:16 pm

كافي نِعِدْ ... يل المِبْتِعِدْ

نِتأمّل إنشوفَكْ

وِنـْبَوّسْ إجفوفــَكْ

بوسَةْ بُعِدْ ... يل المِبتِعِدْ

أكتِب أغَاني الشوكَـ ..لِلغايِبْ عليــِنَهْ

بَلجَنْ يِحِنْ عَالروح يِذكُر مُحبّيــنه

غاب الكَمَر .. والله.. سوده لياليــنَه

ونِترقـّبْ إبكِلْ يومْ نورِكْ يامهديــنه

وعالدَربْ ذابْ الكَلُبْ

عالضاعَتْ أخبــارَه

يتنطّر إبشــاره

بَلجَنْ تِرِدْ ... يَلْ مبتعِدْ

نايلْ أغّني بصـوتْ خَلْ تِسمَع أحبابي

هِبْ يـاهَوا المَحبوبْ نَسـّمْ على بابـي

كَلبي جريحَكْ صار بَس يِنزِفْ إصوابي

وَجهَك دِوا للروح والبَسمَة عطـّابي

بَلسَمْ صِرِت ... يَلـّي غِبـِتْ

يـَلْ شوفتـَكْ بَلسَمْ

بـِيكْ الشـَمِلْ يـِلتـَمْ

شـَدّة وَرِدْ ... يَلْ مِبتِعِدْ

حايـِِر كَضيــتْ إسنينْ وينْ ألكَه عنوانـَكْ

أنشِدْ عَليكْ الجاي ... أنشد عَلى إمجانَـكْ

لِلرايـحْ أنطي أوصافْ سِيفـَكْ و قرآنــَكْ

مَنْ يادَرُبْ نِلكَـاكْ يـَ مصاحب إزمانــَكْ

شـَمع الصـَبُر بآخِـر عُمُــرْ

وينــَكْ يـَ غالينــَه

إتشـَمّتوا بينــَه

أهل الحُقِدْ يل مِبتِعِدْ

كمْ عاذِل ونَمـّام كِعدوا يلومونـــَه

قـَصدْ العَذِلْ واللـّومْ رادوا يِنـَسـّونـَه

لـَجلـَكْ نِظـَل عشــّاكَـ كِلمـا يلومونـــَه

صـار العِشـِكَـ عنوانْ بإسمَكْ يعرفونــَه

مَهدِي العِشـِكَـ... وبكَلْ عِرِكَــ

أحبــابكْ إتعاهَــدْ

والله اليـِظَلْ شــاهِــدْ

يبقى العَهَدْ يل مَبتـعِدْ

من وكتْ المسيّه إيصيــرْ نشعِلْ إلـَكْ شمعـَه

وبين الفرَح والخوفْ توكَـعْ ألف دمعه

مَثلْ الكَـلُبْ من صــار أطوَكَــ على ضِلعَه

سالِمْ عَزيــزْ الروحْ ياربّي بسْ رَجعَه

بنـار الجَمُـرْ صَـار الفجِرْ

شـُمّيسّه لو تِطلـَعْ

حتىّ الكَلُبْ يـِهْجَعْ

يُغفَه إبرغـَدْ يل مِبتِعِدْ

وَردْ المحبـّه ألوانْ يتمايَلْ إحمـولـَه

بـِجفوفـَك الطيباتْ يتمنى مَحصـولـَه

روحي تِريـدَك دومْ بيها أصبَحَتْ سـوله

كـُل ما يمُر طرواك بالفـَرحَة هلهولـَه

زفـّة عِرِس ... فـَرحة و وِنِسْ

بيك الكَلُبْ ذايـِبْ

ذايبْ ولا تايـِبْ

فاضْ الوَجـِدْ يل مِبْتِعِدْ

غـَرّدْ ياطيـر و طِيــرْ وإصعَدْ على الغيـمَه

إخذ الكَلُبْ ويـّاكْ متهَدّل بظيمـَه

بَلجـَنْ يشـوف الغابْ روحي صـُفـَتْ هيمـَه

فرنه يمر ياريت بلجن يمر ديمه

رَشكَة مُطــَرْ ... يل مُنتــَظــَر

رَوّيـنـَه مِنْ فِيضــَكْ

يالطوّلتْ كَيـضكْ

حَنْ عاليعِدْ ... يل مِبْتِعِدْ