قصيدة الشاعر الكبير عباس جيجان في رثاء الوطن

من طرف **الكتلوني** السبت أغسطس 29, 2009 10:00 am

رثاء العراق اريد ارثيك يا هذا العراق الميت الممدود ...... مجتول الوطن مجتول والجتال دوره بكل كتر موجود .. والماله اهل فجار دمه يضيع ما يبجن عليه زينات ويلبسن هدوم السود .. وين اهلك مشوا عنك وين شو خلوك بضعون والدرب مسدود .. ما دفنوك ما دفنوك بس خلوك جثة ألتم عليها الدود .. جابولك جفن من كل زيج ركعه أنوب ومدوا على طولك بلجي يرهم عود .. ترة جنازك الشامت صار ودفانك ترة الفرهود .. بعز الصيف صلبوك بمنايرهم ثلج على العود .. بلجي تذوب بلجي تموع بلجي من المراجل تهجع وكافي وتجل وتهود .. هم رادوا يموتونك غصب والناس كلها شهود .. يا عيط النخل يا متعب الصاعود .. يا شمس الظهر يا لما تلمها حدود .. أهم رادوا يكطعونك أفخاذ أجتاف وكلمن ياخذ بكيفة سهم ويعود .. لكن هاي ما ترهم ابد ما تصير ما طول المراجل ترجف ألها زنود .. ما يدرون هذا ابن العراقية لو يختض يطيح من السما طراجيع السود .. شبعنا من الوعود وعود .. أكلنا وعود شربنا وعود لبسنا وعود .. ياهو اللي يجي علينا يتجنكل يصعد ونمرود .. ديمقراطيتك يا خايب وين شو بس اللميض وريحه البارود .. تسمينا وطن عربان وشجابك على العربان يا ابن ام الربعها يهود .. سكتنا ومو جبن والله ردنا نشوف حدك وين حتى أحنا نحطلك بالمكان حدود .. خليت الوطن للرايح وللجاي خان جغان شله واعبر بكيفك على المكرود .. تقسيم العراق شلون هذا يصير وكلي شلون يرهم عود .. لولا تمرة البصرة لبن اربيل ما يطلع بدرة ولا يخضه الجود .. ولولا كيمر السدة عسل سليمانية ما ينباع شرط الضوك ما مردود .. مو كلتوا الحرية لكل انسان عايش بالعراق بلا سجن وقيود .. جاه هذا الجتل بالناس شتسميه تحرير وامن مفقود .. لو هذا الانفصال اللا تظنه يصير حشدتوله من الاعلام حشود .. من الله خلقنه بهالوطن كلنه عرب واكراد واقليات كلنه اخوان شد ورود .. ما نخلص وحق الله ما نخلص رغم هذه المقابر وبشفل حفرونة الملحود .. شافونا مثل بير الله زمزم ما ينقص فد يوم كل ما خذوا من مايه يرد يزود .. وغيرتنه أجت من غيرة العباس ما هد العلم من كطعوله زنود .. ما تقحط وحق الله ما تقحط ماطول دجله والفرات الخير يركض يطرد الصيهود .. ولك هذا الوطن بيه الحسين ينام يا منه حرامي يشيل كشه عود .. ولك هذا عراق المرتضى الكرار صل الله عليه وكرمه بالجود .. من زاخو لحد الفاو هذا الوطن واحد ما يصير أثنين وشعلينا اذا نبحت جلاب السود .. بالك تلعب بذيلك عليه وتزود .. تعرفهم اهلنا بثورة العشرين والمكوار بعده بمتحفك موجود .. ولجمن بيد الضاري الشيخ صبح مصيود .. خلينا بحجينا اليوم يمته تشيل دباباتك وتطلع بلا مطرود .. لو حلتلك الكعده بالفلوجة يا بن الناس وكل يوم الرتل منه همر مفقود .. وكل يوم الرتل منه همر مفقود ..............